حلت الفنانة آية سماحة ضيفة على برنامج أسرار والذي تقدمه الإعلامية أميرة بدر على قناة CBC، حيث تحدثت من خلاله بالعديد من التصريحات المثيرة للجدل أبرزها تعرضها للتحرش في سن صغير.
آية سماحة: اتعرضت للتحرش وأنا 11 سنة
وقالت آية سماحة في تصريحات رصدها موقع تحيا مصر عن تعرضها للتحرش: قابلت كل المواقف اللي ممكن تضايق وكل حاجة ممكن تتخيليها، طفلة في عالم غريب عليها، تقابلي سخافات ومواقف مكانتش لطيفة علمتني أعرف أوقف أي حد عن حده، أسوأ موقف مثلا إني تعرضت للتحرش بس عرفت أتعامل، كنت صغيرة جدا 11 أو 12 سنة، ولما كنت أروح أقول لأمي كانت بتعرفني إزاي أتصرف ودايما في ظهري، من أول ما بدأت مجال الإعلانات، حد حط إيده على بشكل سخيف، وعرفت أقول له إيدك لأقطعهالك.
آية سماحة: بعت هدومي عشان كنت محتاجة فلوس
وتحدث آية سماحة عن بيع ملابسها على انستجرام من أجل الحصول على مال بعد ضعف حالتهم المادية، قائلة: كنا في مستوى معين، ولما الفلوس قلت كتير فضلت وسط ناس في نفس المستوى، لكن أنا مبقتش في نفس المستوى، ولما مكانش في شغل ابتديت أفكر إزاي أعمل فلوس. بعت هدومي على إنستجرام وحاجات بتاعتي مش عايزاها، واشتغلت في شركة سياحة، وخرجت من الجامعة في سنة تالتة، وبدأت آخد ورش تمثيل علشان ده اللي بحبه.
آية سماحة تكشف سبب عدم رغبتها في الإنجاب
وكشفت آية سماحة عن عدم رغبتها في الإنجاب، قائلة: مش قادرة أتحمل المسئولية ومش قادرة أضحي، وحاسة إني عايزة آخد بالي من نفسي فترة، مش قادرة أجيب حد يبقى حياتي، أنا محتاجة حياتي اكتر، مجرد ما تجيبي طفل اتربطتي من رقبتك، طول الوقت هو اللي بتفكري فيه ودي الأمومة بالنسبة لي، ليه أجيب بني آدم وأنا لسه مش عارفة أربي دلوقتي، ومش عارفة إيه الصح وإيه الغلط اللي المفروض أقوله له، أنا لسه بكتشف، مش شايفة ناس كتير حواليا مبسوطة، ومش شايفة ظروف ملائمة أجيب فيها بني آدمين والحياة صعبة جدا، والموضوع مش ماديات. أنا تجربتي كطفلة كانت مش مريحة، مش عايزة أجيب طفل مش مرتاح.
يذكر، أن آخر أعمال آية سماحة مشاركتها في مسلسل الكابتن والذي تم عرضه على شاشة قنوات dmc وذلك في النصف الأول من السباق الرمضاني وشاركت به إلى جانب الفنان اكرم حسني.
نقلاً عن : تحيا مصر
لا تعليق