تامر فرج: جالي احباط بعد مسلسل الآنسة فرح وبطلوع الروح واستغربت ليه مدونيش ادوار بطولة!

رغم تحقيقه نجاحات كبيرة من خلالهم، كشف الفنان تامر فرج عن تعرضه لإحباط وأزمة ثقة بعد مسلسلاته بطلوع الروح والأنسة فرح، مشيرا إلى أنه تعجب من عدم طلب المخرجين له لأداء أدوار للبطولة.

تامر فرج: عملت اعمال اظهرتني وبقيت اقول ليه معملش بطولة 

وقال تامر خلال استضافته في بودكاست “وفيها إيه”، على منصة “ستوري بالعربي” في تصريحات رصدها موقع تحيا مصر: حصلي أزمة ثقة في نفسي بعد ما عملت كمية أعمال قوية جدًا وأظهرتني زي الآنسة فرح وطلعت روحي بشخصية بكير الحلواني، وبقيت أقول إزاي بعد عملين بالشكل ده متصعّدش إلى مستوى جديد والمنتجين يثقوا فيّا ويدوني أدوار بطولة أكبر؟ هل أنا إمكانياتي وحشة؟ 

وأضاف: وأدركت إن ده حصل بسبب إن مكنش فيه تسليط إعلامي عليّا، ودلوقتي الواحد عشان يبقى نجم ومعروف مبيبقاش ليها علاقة أنت موهوب ولا لا، ولكن هل عليك أضواء ولا لا؟ المهم عامل قلق على السوشيال ميديا وتريند، وأنا مطلعتش تريند بعد الفرص ديه، فالمنحنى بتاعي نزل، وهنا عيدت حساباتي وعرفت إني مش ماشي صح، لأني ماشي بمجهودي.

تامر فرج: مبعرفش اطلب شغل والناس طول عمرها اللي بتطلبني 

وأردف تامر: اتعودت طول عمري إني لما أعمل شغل حلو الناس تطلبني بعدها حتى لما كنت شغال مرشد سياحي مكنتش بروح شركات السياحة وأطلب شغل، لذلك مبعرفش دلوقتي أطلب شغل، ومبعرفش أستخدم السوشيال ميديا، مش هبقى فنان عشان عدد المتابعين بتوعي، لذلك عندي أزمة ثقة في أدواتي ومش هعرف أحلها للأسف.

وأشار تامر فرج إلى أنه رفض دخول مجال التمثيل من مجال الإعلانات عندما تلقى العديد من العروض في الفترة الجامعية، وذلك لتمسكه بمبدأ دخول مجال التمثيل من بابه السليم وليس الباب الخلفي ألا وهو الإعلانات، قائلًا: ولكن دلوقتي الباب الخلفي بقى التريند والسوشيال ميديا.

تامر فرج في مسلسل وتر حساس 

من ناحية أخرى، يعرض للفنان تامر فرج في الفترة الحالية مسلسل وتر حساس الموسم الثاني والذي خاص بطولته إلى جانب نخبة من نجوم الفن من بينهم الفنانة غادة عادل والفنانة هيدي كرم، والفنان أحمد علاء جاميكا، والفنانة انجي المقدم، والفنانة نور منصور، والفنان كماف ابو راية وعدد من النجوم الاخري.

كما عرض له سابقا حكاية الوكيل من مسلسل ما تراه ليس كما يبدو، وشارك من خلاله في شخصية بلوجر، وحقق العمل نجاحات كبيرة خلال فترة عرضه على شاشة التلفزيون ومنصتي واتش ات وشاهد.