حفيد عبد الحليم حافظ يكشف سبب اغلاق منزله: اتعرضنا لتطاول على السوشيال ميديا

خرج حفيد عبد الحليم حافظ للكشف عن تفاصيل اغلاق منزل المطرب الراحل، مشيرا إلى أن الجمهور اقترح عليه زيارة المنزل بمقابل مادي وعندما قام بعمل استطلاع رأي على هذا الأمر ، قابلة رواد مواقع التواصل الاجتماعي بالهجوم، ما أدى إلى غلقه المكان.

حفيد عبد الحليم حافظ: فاتحين البيت بقالنا 48 سنة 

وقال حفيد عبد الحليم حافظ في مداخلة هاتفية لـ برنامج الستات رصدها موقع تحيا مصر: فاتحين البيت بقالنا 48 سنة بنستقبل الناس من جميع أنحاء العالم، والبيت مفتوح مجانا عمرنا ما طلبنا من اي حد مقابل مادي طبقا لوصية عبد الحليم، واللي اصلا كانت أن بيته يفضل مفتوح لأسرته عشان يحافظ على الترابط الأسري مش عشان الجمهور ولكن احنا قررنا نفتحه للجمهور عشان نحافظ على عبد الحليم وفنه يفضل موجود معاهم.

وتابع حفيد عبد الحليم حافظ: عملت بيدج على الفيسبوك عشان أقدر انظم الدنيا واحافظ على فن عبد الحليم، وبقى يجيلي طلبات زيارة رهيبة كل يوم اكتر من 600 رسالة، حجزنا فري لحد يوم 17 فبراير وبندخل 100 بني ادم كل يوم البيت وده بيت سكني احنا عايشين فيه.

حفيد عبد الحليم حافظ: منزل الراحل مش هيتفتح غير في ذكراه 

واختتم حفيد عبد الحليم حافظ حديثه: ناس بدأت تقترح علينا نعمل ويب سايت عشان الحجز يبقى اسهل وأسرع أو خدوا مبلغ رمزي وتعينوا شركة تدير الموضوع ده، فعملت استطلاع رأي و85٪ من الناس قالت أيوة عايزين نعمل كدة، وابتدي يبقى فيه هجوم والناس على السوشيال ميديا تقل أدبها، فقفلت الصفحة، وتم غلق البيت ولكن الناس اللي حاجزة لحد يوم 15 نوفمبر انا ملتزم معاهم بالزيارة، وبعد كدة مفيش حجوزات تاني، وهيتم فتح البيت في ذكرى عبد الحليم حافظ فقط.

غلق منزل عبد الحليم حافظ ومنع الزيارات عنه 

وكان قد تصدرت أنباء غلق منزل عبد الحليم حافظ ومنع الزيارات عنه حديث مواقع التواصل الاجتماعي المختلفة، وذلك بعد فرض رسوم رمزية وهو الأمر الذي جعل أسرة عبد الحليم حافظ تتعرض لهجوم مروع على مواقع التواصل الاجتماعي المختلفة، واجبر حفيد عبد الحليم على غلق صفحته التي كان قد أنشأها لتنظيم الزيارات لمنزل عبد الحليم دون حدوث أي خلل أو مشاكل او تكدس، كل ذلك دون مقابل حتى 16 نوفمبر.