كنت فاهمة الحب غلط وشكرا انك طمنت قلبي

تحدثت الفنانة اسما شريف منير عن معرفتها بمعنى الحب الحقيقي عندما قابلت زوجها الحالي، موجهة له الشكر على طمئنة قلبها من ناحيته، وذلك في منشور رصده موقع تحيا مصر عبر حسابها الرسمي بموقع تبادل الصور والفيديوهات انستجرام.

أسما شريف منير تتحدث عن الحب وتوجه رسالة لزوجها

وقالت اسما شريف منير في منشورها عبر موقع انستجرام: كنت فاهمة الحب غلط.. كنت فاكره لما بطني توجعني و افضل ألف ورا حد، يجنني و يديني حب بالقطاره، أو أقعد مع صحبتي نحلل هو قال كده ليه؟ قصده ايه؟ هيتكلم ولا لأ؟ كنت فاكرة إن ده هو الحب… لكن ده كان إحساس قلق، الإحساس ده بنحبه ونفتكره حب عشان بيخلي الجسم والقلب والعقل مكهرب، وده بيعزز الدوبامين، زي جرعة بتخليك مدمن الشخص حتى لو مؤذي ، و بيلعب بمشاعرك.

وتابعت اسما شريف منير:  بس الحقيقة إن الحب مش كده خالص…الحب راحة، الحب إن الشخص يطمنك من قبل ما تقلق، يعرفك اللي إنت عايز تعرفه من غير ما تسأل، والمشاعر تبقى واضحة مش محتاجة فك شفرات، الحب إنك تلاقي مكان ترتاح فيه، قلب تحس فيه بالأمان مش بالسؤال، شخص يشوفك ويختارك كل يوم من غير ما تضطر تجري أو تثبت نفسك، الحب مش كهرباء توترك… الحب هو الأرض اللي توقفك ثابت، شكراً انك طمنت قلبي .

زواج أسما شريف منير للمرة الثالثة 

وكانت قد أعلنت اسما شريف منير زواجها للمرة الثالثة في يونيو المنقضي، حيث قالت: أنا الحمد لله اتجوزت وده قرار جه بعد فترة طويلة من رحلة عشتها مع نفسي من حاجات كتير قوي اتعلمتها تجارب دخلت فيها اختيارات وصلت لها حاجات بقيت بحبها، وحاجات ما بقيتش بحبها. فهمت نفسي أكثر اتعرفت على نفسي أكثر، فهمت أنا محتاجة إيه من الجواز، إيه المهم وإيه اللي مش مهم، إيه اللي محتاج مجهود وإيه اللي مش محتاج مجهود.

وتابعت: وقعدت فترة كبيرة جداً بدعي ربنا بإنه يعوضني خير ويعوضني خير صبري، لأني كنت في الفترة دي بحاول أقصى حاجة في الدنيا إني أحافظ على نفسي وما أغضبش ربنا. وحاولت إني أدعي ربنا كتير قوي إنه يقف جنبي ويختار لي، وكنت دايماً بقول: يا رب اختار لي ولا تخيرني، وكنت مركزة جداً في موضوع إني أتعامل بالتوكل، وتوكلت على ربنا تماماً تماماً في القرار ده. وتعاملت على إنه هو اللي هيجوزني وهو اللي هيقول لي أعمل إيه، قلت له: سهل لي الطرق المعينة اللي أنت عايزني أعملها. أنا نيتي خير ومش عايزة أعمل حاجة غلط وعايزة أتجوز وأتستر وأعيش حياة كريمة فيها احترام وفيها تقدير وفيها عوض.

أسما شريف منير عن زوجها: شدني فيه أنه قريب من ربنا 

وعن سبب زيجتها الثالثة، قالت أسما شريف منير: اللي شدني في أحمد إنه قريب من ربنا و بيغيرش الحقايق وعارف مسؤولياته تجاه ربنا وعيلته، وعارف معاملاته تجاه ربنا عاملة إزاي. فلقيت الشخص اللي ممكن يبقى بيعامل الناس وجواه سالك، جواه إيمان ده حد تقدر تثق فيه وتحس إنه تقدر تبني معاه حياة وإنت متطمن. أكيد بنتضايق ونزعل من بعض، احنا الاتنين فينا عيوب وكل حاجة زي كل البشر ، بس فكرة إن الاختيار نفسه ربنا وفقني فيه و سهلها من عنده، يا رب يبقي خير، لحد ما أموت يبقى هو في حياتي.