يحيى الفخراني: المصريين لمحين جدا للإيفيه وبعرف أن العرض نجح من رد فعل الاطفال

في لقاء استثنائي، حل الفنان يحيى الفخراني ضيف على برنامج يحدث في مصر والذي يقدمه الإعلامي شريف عامر على شاشة قنوات mbc مصر، والذي تحدث خلاله عن مسرحية الملك ليرا والذي أعاد تقديمها مرة أخرى بعد عدد من المرات الناجحة.

يحيى الفخراني عن تقديم الملك ليرا: فيه ناس بتقولي انت مبتزهقش 

وقال يحيي الفخراني عن مسرحية  الملك ليرا في تصريحات رصدها موقع تحيا مصر: الناس بتقولي انت مبتزهقش.. بس الجمهور المتغير مش بيخليني أزهق وفيه ناس بتقول انها حضرتها 17 مرة، وناس بتقولي دي احسن مرة، وفيه واحدة صوت ضحكتها خلتنا نغير شكل الأداء لاننا عرفنا اي اكتر الايفهات اللي بتضحك.

وتابع يحيى الفخراني حديثه عن حبه الشديد لتلك المسرحية: الفنان لازم يندمج في الشخصية  وبحبها بدليل اني عملتها مسلسل وحاسس العلاقة الأسرية أهم شيء في الدنيا.

يحيى الفخراني: المصريين لمحين جدا للإيفيه 

واضاف يحيى الفخراني: استعدادي كل مرة لـ عرض مسرحية الملك ليرا كأنها أول مرة، ومش بيهمني غير المتذوق والمصريين متذوقين ولمحين جدا للافيه، وما بعترفش بالنخبة وبحس بنجاح للعرض لما الاقي في اطفال مستمتعين لانه رد فعله بيكون تلقائي جدا.

واستكمل يحيى الفخراني: الواحد المفروض ميفكرش في نجاحه أو عدمه المفروض يعمل اللي حاسس أنه صح لو سبت الجمهور يقودني ممكن أنزل درجة ورا التانية ومبحبش أتدخل في شغل المخرج إلا لو طلب مني رأي.

يحيى الفخراني:  ممثل واحد ممكن يفسد العرض وينهيه

وكشف يحيى الفخراني صعوبة التمثيل، قائلا: المسرح شبه البيت وممثل واحد ممكن يفسد العرض وينهيه، واهم حاجة في المسرح النص والممثل ومينفعش أبدا نشتغل مسرح مع حاجة تانية والجمهور هو اللي بيحدد طول العرض ولا تز انا تعبت أو زهقت.

وأكد: طول مانا عندي مسرح ببقى طول النهار بجهزله وكل شوية لازم ارجع، ولو مش مهتم وقلقان هيكون اول سلم فشل ليا.

مسرحية الملك لير هي إحدى أشهر روائع المسرح العالمي للكاتب ويليام شكسبير، وتعد الثالثة التي يقدمها يحيى الفخراني، إذ سبق له أن قدمها لأول مرة عام 2001 على المسرح القومي، ثم عاد ليعرضها مرة أخرى عام 2019 في القطاع الخاص.