“مفيش مفاوضات بين بيراميدز والشناوي.. واللاعب مستمر في الأهلي

نفى الإعلامي أحمد شوبير، حارس مرمى الأهلي ومنتخب مصر الأسبق، وجود أي مفاوضات بين نادي بيراميدز ومحمد الشناوي، حارس مرمى النادي الأهلي، مشددًا على أن كل ما يتم تداوله في هذا الشأن غير صحيح تمامًا، ولا يمت للواقع بصلة، ويستعرض تحيا مصر التفاصيل. 

شوبير ينفى مفاوضات بيراميدز مع الشناوي 

وقال شوبير في تصريحات عبر برنامجه الإذاعي صباح اليوم: “بيراميدز لم يفاوض محمد الشناوي، ولا الأهلي تفاوض مع بيراميدز بشأنه، ولا الشناوي نفسه عايز يمشي. أنا مش فاهم مين بيطلع الأخبار دي، وليه الناس بتصدقها من غير دليل؟”.

وأضاف: “كلمت ناس مسؤولة في بيراميدز، وقالولي بشكل واضح إن عندهم أحمد الشناوي، ومحمود جاد، وشريف إكرامي، بالإضافة لحراس شباب بيجهزوهم للمستقبل، ومش في بالهم التعاقد مع حارس جديد”.

وأكد شوبير أن الشناوي لا يفكر في مغادرة القلعة الحمراء، رغم الضغوط الأخيرة التي تعرض لها بعد جلوسه احتياطيًا لبعض الوقت، مضيفًا: “الشناوي لاعب كبير وقائد داخل الأهلي، وبيتمتع بثقة كبيرة من الجهاز الفني والإدارة، وكل تركيزه حاليًا على استعادة مستواه والمنافسة بقوة للعودة للتشكيل الأساسي”.

وأشار إلى أن تداول مثل هذه الأخبار المغلوطة يهدف فقط إلى زعزعة استقرار الفرق الكبيرة، وإثارة الجدل بين الجماهير، مطالبًا الإعلام بتحري الدقة، والتأكد من صحة المعلومات قبل نشرها.

واختتم شوبير حديثه قائلاً: “المنافسة في مركز حراسة المرمى داخل الأهلي صحية، وكل حارس بيشتغل على نفسه والشناوي مش من نوعية اللاعبين اللي يهربوا من التحدي، وده اللي الناس لازم تفهمه”.

شوبير يكشف رأيه في جلوس محمد الشناوي على الدكة 

وقال شوبير: “محمد الشناوي زعلان إنه قاعد احتياطي، وده طبيعي جدًا، أنا شخصيًا كنت بزعل لما كنت بقعد احتياطي، قعدت لثابت البطل، وقعدت لإكرامي، وقعدت لعصام الحضري، وقبلهم مصطفى كمال، أنا كنت نفسي أسلم على إكرامي، ولما حصل ده، اتضايقت عشان قعدت له دكة، وده أمر طبيعي لأي حارس عنده طموح”.

وأضاف شوبير: “النهاردة شوبير سلّم على إكرامي، وبعد شوية عاوز يلعب عليه، فين الأزمة؟ الشناوي عاوز يلعب، وعنده طموح، وبيتمسّك بمكانه في المنتخب، وزي ما أنا زمان كنت عايز ألعب، طبيعي هو كمان عايز يستمر في التواجد بشكل أساسي”.

وفي الوقت نفسه، انتقد شوبير التهويل الإعلامي والضجة التي أُثيرت حول وضع الشناوي، قائلاً: “إيه اللي مزعل الناس؟ ده بيقول، وده بيعيد، وده بيزيد.. هو فيه اجتهاد في التمرين ولا لأ؟ لو الشناوي مركز، وبيشتغل على نفسه، الفرصة هتيجي، واللعب هيكون بالأداء مش بالأسماء”.