أقوال المجني عليها الثانية في مطاردة الواحات

استمعت النيابة العامة في أكتوبر إلى أقوال المجني عليها الثانية، في مطاردة طريق الواحات، وهي الواقعة التي أثارت الجدل على مواقع التواصل الاجتماعي خلال الساعات الماضية، بعد تعرض 3 فتيات للإصابة عقب مطاردتهن من قبل 3 سيارات يقودها 3 شباب.

وأوضحت المجني عليها الثاني، قائلة: اللي حصل إن أنا كنت في البيت وكلمتني رنا عشان حفلة تخرجها يوم 2025/8/21 وكانت عايزة تنزل تشتري حاجات للتخرج فكلمتني امبارح 2025/8/13 الصبح قالتلي تعالي ننزل نشرب حاجة وعدت عليا بعربيتها ونزلنا روحنا مكان اسمه سيركيل كي اللي في بنزينة شيل أوت في الحي الأول، وبعد كده قعدت أنا وهي جوا الماركت وأول ما دخلنا لقينا كل اللي بره شباب فقلنا نقعد جوا أحسن وطلبنا حاجة.

وأضافت: الشباب اللي كانوا قاعدين ناحية اليمين واحنا داخلين نقلوا وقعدوا قدامنا عشان احنا كنا قاعدين على الزجاج وباينين ليهم فقلنا للشخص اللي شغال جوا عايزين ننزل الستاير عشان منبقاش باينين ليهم عشان نقعد براحتنا، وفي واحدة اسمها حبيبة عارفة رنا بس مش صحاب أوي كلمتها تسألها إنتي فين قالتها على مكانا فقالتها هجيلكم وجت فعلا قعدت معانا شوية ومنعرفش أي معلومات عنها هيا معرفه سطحية، فلما وصلت اللي في المكان طلبوا مننا نطلع نقعد بره عشان هيمسحوا الأرض جوا المكان فطلعنا بره وأخدنا تربيزة على جنب محدش حوالينا.

وواصلت: ولما طلعنا بره رنا دورت العربية راحوا هما قاموا ودورا عربياتهم واتحركوا هما الأول قبلنا فمجاش في دماغنا انهم هيمشوا ورانا لحد ما طلعنا على طريق الواحات لقيناهم 3 عربيات ورانا فقلت لرنا اهربي منهم واجري عشان نتوه منهم فراح الولد اللي راكب عربية بي إم دابليو جه ناحية اليمين وأنا قاعدة جنب رنا وهي سايقة ويقولنا انتوا رايحين فين اقفوا طب تعالوا أمشوا ورانا فانا قولت لرنا صاحبتي إقفلي الزجاج وسيبك منهم.

وأكملت: فضل بتاع البي إم جنبنا وشايف إن فيه عربية نقل قدامنا على الطريق ومعرفتش تتحرك ومفيش حل قدامنا غير إننا نطلع على الرصيف أو تخبط في العربية النقل أو تخبط فيه هو فخبطنا في العربية النقل وهما طلعوا يجروا كلهم واتصابت أنا ورنا بس وحبيبة محصلهاش حاجة ولقيت وشي كله دم وإيدي محشورة في الاكصدام.

وأردفت: بعدها قطعت هدومي عشان أعرف أطلع والطرحة اتقطعت وشعري اتكشف وبعدها كلمنا كل صحابنا عشان يلحقونا وقفت لينا واحدة وأخذتنا على المستشفى، وأنا كنت بدور على الموبايل فلما لقتني بدوخ قولت لازم أركب مع الست اللي وقفت عشان نروح المستشفى وملقتش حاجتي وروحت على مستشفى 6 أكتوبر المركزي وعملنا إشاعات إحنا الثلاثة.